සල් සපුනා’ හි ආලියාගේ චරිතය තුළින් බොහෝ සේ ජනප්‍රිය වූ ෂනාලි නිරූපිකාවක් හා නිවේදිකාවක් ලෙසද කටයුතු කරනවා. ඉහළ ජනප්‍රියත්වයක් ලැබුවත් පසුගිය දිනවල ෂනාලිව ක්ෂේත්‍රයේ දකින්න ලැබුණේ නෑ. එයට හේතුව දැනගන්න අපි ෂනාලිට කතා කළා.
ෂනාලි කොහොමද ඉතින් ජීවිතේ?
ජීවිතේ සතුටින් ගෙවෙනවා.
නිරූපණ ක්ෂේත්‍රයට තමයි ඔබ මුලින්ම එන්නේ?
ඇත්තටම මගේ ආසාව තිබුණේ ගුවන් සේවිකාවක් වෙන්න. මම එයාලයින් ටිකටින් පවා කළා. මගේ අම්මට හොඳට ඇඳුම් ඩිසයින් කරන්න පුළුවන්. එයා ඩිසයින් කළේ විලාසිතා පොත් බලන්. ඒ තියෙන විලාසිතා දැක්කම මට හිතුණා පස්සේ නිරූපණ ශිල්පිනියක් වෙන්න. ඒ හීනෙත් එක්ක මම ඇතුළත් වුණා ප්‍රවීණ නිරූපණ ශිල්පී රොසෑන් ඩයස්ගේ Zaid images කියන නිරූපණ ශිල්පිනියන් පුහුණු කරවීමේ වැඩසටහනකට.
නිරූපණ ක්ෂේත්‍රය නිසාද ඔබට රඟපාන්න ලැබුණේ?
ඔව්. එතනින් පස්සෙ තමයි මට රංගනයටත් ආසාවක් ඇති වුණේ. මම ස්ක්‍රීන් ටෙස්ට් තුන හතරකටම ගියත් ඒ එකකින්වත් මාව තේරුණේ නෑ. ඊට පස්සේ මම ඒ වැඩේ අතඇරියා මම මේකට ගැළපෙන්නෙ නෑ කියලා. නමුත් ඒ බොහෝ තැන්වලදී වුණේ රඟපාන්න තෝරගෙන ඉන්න නළුවා මට වැඩිය උසින් අඩුයි. මගේ උස 5’6’’ ක් විතර. ඉතින් ඒ නිසා මට හිතුණා මට ගැළපෙන්නේ නිරූපණ ක්ෂේත්‍රය කියලා.
ඉතින් එහෙම ලේසියෙන්ම හම්බවුණ දුර්ලභ අවස්ථාවට කැපිලි කෙටිලි ආවේ නැද්ද?
අපෝ ආවා. කවුරුත් කැමැති නෑ තමන් අමාරුවෙන් ලබාගත්ත දෙයක් තව කෙනෙක් ලේසියෙන්ම ලබාගන්නවට. මමත් මේ කට්ට කාලා ආවේ ඔයාලත් ඒ කට්ට කන්න ඕන කියලා තමයි එයාලා බලාපොරොත්තු වෙන්නේ. නමුත් සුසිලා ආයතනය මාව විශ්වාස කරලා “සල් සපුනා” නාට්‍යයේ ‘ආලියා’ කියන ප්‍රධාන චරිතයම මට දුන්නා. දවසක් දමිතා අක්කාව දැකලා අපේ අම්මා කිව්වා අන්න දමිතා අබේරත්න ඉන්නවා ගිහින් කතා කරලා එන්න කියලා. එදා මම ඇය එක්ක පින්තූරයක් ගත්තා. එච්චර ආසාවෙන් හිටපු නළු නිළියො එක්ක රඟපාන්න ලැබුණ එකම වාසනාවක්.
ෂනාලිගේ වෘත්තිය රංගනයද?
නෑ. මම සොෆ්ට්ලොජික් ආයතනයේ රැකියාව කරන ගමන් තමයි සියල්ලටම සහභාගී වෙන්නේ. මගේම කේක් ව්‍යාපාරයකුත් කරගෙන යනවා ‘Barbies cake factory’ කියලා. ඒ අතරේ තමයි රංගන, නිරූපණ කටයුතු කරන්නේ.
එච්චර ජනප්‍රිය වුණ ආලියා දැන් වැඩිය පේන්න නැත්තේ ඇයි?
දැන්නම් මම රංගන කටයුතුවලින් ඈත් වෙලා ඉන්නේ. නමුත් නිරූපණ කටයුතු දිගටම කරගෙන යනවා. ඒ වගේම නිවේදිකාවක් විදිහට ක්ෂේත්‍රයේ රැඳී ඉන්නත් බලාපොරොත්තු වෙනවා. මම පසුගිය ජූනි 10 වැනිදා විවාහ ගිවිසගත්තා. ඉතින් මට හිතුණා විවාහයෙන් පස්සේ රංගනයට සමුදෙන්න. ඒක තමයි දැන් වැඩිය රූපවාහිනියේ නොපෙනෙන්න හේතුව.
සැමියා මුණගැසුණ විදිහත් කියමු එහෙනම්?
ඔහු රජිත. මුණගැසුණේ සොෆ්ට්ලොජික් ආයතනයෙන්. රජිත කියන්නේ මට ලැබුණු හොඳම යාළුවා. අපි දෙන්නම කඩවත නිසා අපේ ආයතන ප්‍රධානියත් මාව කාර්යාලයට එක්ක එන්න කියලා රජිතට තමයි බාරදුන්නේ. ඒ නිසා මටයි රජිතටයි හැමෝම විහිළු කරන්න පටන්ගත්තා අපි පෙම්වතුන් කියලා. නමුත් මම මට විහිළු කරපු හැමෝටම කිව්වේ මේ ලංකාවේ අන්තිම පිරිමියා රජිත වුණත් මම එයාවනම් බඳින්නෑ කියලා. රජිතගේ වැරැද්දක් නැතත් මම එහෙම කිව්වා. මොකද මගේ හිතේ රජිත ගැන එහෙම අදහසක් තිබුණේ නෑ. අනික එතකොට අපි දෙන්නටම වෙන වෙන සම්බන්ධතාත් තිබුණා. නමුත් ඒ දෙකම එච්චර සාර්ථක වුණේ නෑ. අපේ වටේ හිටපු හැමෝමත් කිව්වා අපි දෙන්නම තමයි ගැළපෙන්නෙ කියලා. ඉතින් එහෙම යද්දි අපේ යාළුකම අවබෝධයත් එක්ක ආදරයක් වුණා. අද මට හිතෙනවා අපේ යාළුවෝ නෑදෑයෝ කියපු දේවල් විහිළු විදිහටම බාර අරගෙන ඉඳලා රජිතව මඟහැරුණනම් මම කළේ ලොකු මෝඩකමක් කියලා.
කෞශල්‍යා පතිරණ
